Í eignasafni Reita eru byggingarréttir og ótekjuberandi eignir sem metnar voru á 9.686 millj. kr. í árslok 2021. Þar á meðal eru fasteignir sem mynda leigutekjur og metnar væru á um 3.380 millj. kr. ef notuð væri sama aðferðafræði við virðismat þeirra og beitt er við virðismat tekjuberandi eigna. Alls er um að ræða byggingarrétt að um 240 þúsund fermetrum á höfuðborgarsvæðinu sem félagið getur nýtt sér eða selt.

Söluhagnaður af Orkureit um 1.300 millj.kr.

Í október s.l. gerðu Reitir samkomulag við Íslenskar fasteignir ehf. um sölu á Orkureit fyrir 3.830 m.kr. Um er að ræða fasteignina Ármúli 31 ásamt öllum nýbyggingarheimildum á lóðinni í tengslum við nýtt deiliskipulag. Viðskiptin ná ekki til fasteignarinnar að Suðurlandsbraut 34, þ.e.a.s. gamla Rafmagnsveituhússins.

Samkomulagið er með fyrirvörum en afhending er áætluð á fyrri hluta annars ársfjórðungs 2022. Með samkomulaginu skuldbinda Reitir sig til samstarfs um hönnun, útfærslu og kaupa á um 1.520 fermetrum af atvinnuhúsnæði sem byggt verður á lóðinni.

Orkureiturinn er á horni Suðurlandsbrautar og Grensásvegar og nær upp að Ármúla. Gert er ráð fyrir rúmlega 400 íbúðum í 3-8 hæða byggingum ásamt 4-6 þúsund fermetrum atvinnuhúsnæðis. Reiturinn verður að líkindum fyrsta BREEAM vistvottaða skipulagið í Reykjavík.

Nánari upplýsingar um verkefnið má finna á www.orkureitur.is.

Uppfært aðalskipulag opnar á þróun Kringlusvæðisins

Uppfært aðalskipulag Reykjavíkur, ASK 2040, sem tók gildi í ársbyrjun 2022 opnar fyrir þær skipulagsbreytingar sem Reitir hafa unnið að undanfarin ár. Aðalskipulagið gerir ráð fyrir að byggðar verði 1.000 íbúðir á svæðinu öllu, sem er að stóru leyti í eigu Reita.

Deiliskipulag fyrsta áfanga, sem nær til suðvesturhluta svæðisins, er í undirbúningi  en þar er gert ráð fyrir rúmlega 50 þús. fermetra byggð á 5 byggingareitum með um 350 íbúðum. Reiknað er með að uppbygging fyrsta áfanga geti hafist innan 3ja ára en gert er ráð fyrir að svæðið allt byggist upp á 10-15 árum.

Uppbygging Kringlunnar er langtímaverkefni um þróun samfélags, með blöndu af íbúðum, verslun og þjónustu, menningu og listastarfsemi. Íbúðabyggð við Kringluna verður áhugaverður kostur fyrir þau sem vilja búa miðsvæðis með aðgang að þeirri víðtæku þjónustu og afþreyingu sem finna má á Kringlusvæðinu auk þess að njóta nálægðar við miðbæinn og stór atvinnusvæði.

Skipulag atvinnukjarna í landi Blikastaða miðar fram

Í landi Blikastaða í Mosfellsbæ eiga Reitir um 15 hektara svæði þar sem fyrirhuguð er uppbygging á 90 þúsund fermetra atvinnukjarna. Náttúrugæði, sjálfbærni og samnýting er höfð að leiðarljósi við skipulag svæðisins sem verður vottað skv. BREEAM Communities vistvottunarkerfinu. Skipulagsvinnu er að mestu lokið og unnið er með Mosfellsbæ varðandi næstu skref. Væntingar standa til þess að gatnagerð og framkvæmdir geti hafist í árslok 2022.

Nánari upplýsingar um verkefnið má finna á www.reitir.is/blikastadir

Aðrir byggingarréttir og þróunareignir

Aðrir byggingaréttir félagsins eru tengdir lykileignum í eignasafni félagsins á höfuðborgarsvæðinu, t.d. á Barónsstíg, Vogabyggð og á lóðinni að Höfðabakka 9.

Í desember 2019 voru tilkynnt áform um að breyta Laugavegi 176, Gamla Sjónvarpshúsinu, í nýtt Hyatt Centric hótel með veitingastað, bar, fundarsölum og bíla­stæðum fyrir gesti. Gert var ráð fyrir að framkvæmdir myndu hefjast í upphafi árs 2021 en vegna heimsfaraldursins var þeim slegið á frest. Ný tímalína liggur ekki fyrir að svo stöddu og hefur húsið verið að mestu leyti í útleigu