Samfélag og umhverfi

Reitir tóku ákveðin skref í átt að sjálfbærni á árinu 2021. Kolefnislosun af rekstri hélt áfram að lækka og við bættum okkur í flokkun úrgangs í framkvæmdaverkefnum. Unnið er að því að kortleggja orkunotkun leigutaka í öllum okkar byggingum.

Samfélagsskýrsla Reita 2021

Samfélagsskýrslan er unnin í samræmi við UFS leiðbeiningar Nasdaq og skiptist í þrjá meginkafla; umhverfi (E), félagslegir þættir (S) og stjórnarhættir (G).

 
 

Áfram unnið að vottun húsnæðis Reita

Unnið er að BREEAM In-use vottun Skaftahlíðar 24, skrifstofu Landspítala. Húsið verður þriðja hús Reita til að hljóta vistvottun en húsnæði Umhverfisstofnunar hlaut Svansvottun fyrir endurbætur húsnæðisins í fyrra.

Byggingarnar við Skaftahlíð 24 voru endurnýjaðar af miklum metnaði árið 2019, sú vandaða vinna skilar sér nú í því að mjög litlar breytingar þarf að gera til að hljóta vottun.

Samstarf og skuldbindingar á sviði samfélagsábyrgðar og sjálfbærni

  • Festa - miðstöð um samfélagsábyrgð

    Reitir er aðili að Festu, miðstöð um samfélagsábyrgð. Hlutverk hennar er að auka þekkingu á samfélagsábyrgð fyrirtækja, stofnana og hvers kyns skipulagsheilda til að tileinka sér samfélagslega ábyrga starfshætti og stuðla að aukinni sjálfbærni.

  • Loftslagsyfirlýsing Festu og Reykjavíkurborgar

    Reitir undirrituðu yfirlýsinguna árið 2015 sem fól í sér aðgerðir í loftslagsmálum; skuldbindingu um minnkuð loftslagsáhrif, minni losun úrgangs auk þess að birta niðurstöður mælinga. Rúmlega 100 önnur fyrirtæki og stofnanir tóku þátt í loftslagsyfirlýsingunni.

  • UFS viðmið Nasdaq

    UFS viðmið Nasdaq á Norðurlöndunum snúa að upplýsingagjöf um starfsemi og áhrif skráðra fyrirtækja út frá umhverfi, félagslegum þáttum og stjórnarháttum (UFS).

  • Grænni byggð

    Reitir voru meðal stofnaðila Grænni byggðar 2010 og hafa stutt samtökin með fjárframlagi og vinnu starfsfólks síðan. Auk þess hafa samtökin hlotið stuðning í formi húsnæðis undanfarin tvö ár. Grænni byggð er samstarfs og fræðsluvettvangur um sjálfbæra þróun byggðar.

  • IcelandSIF

    Tilgangur IcelandSIF er að efla þekkingu fjárfesta á aðferðafræði sjálfbærra og ábyrgra fjárfestinga og auka umræður um ábyrgar og sjálfbærar fjárfestingar.

Umhverfismál

 

Endurnýtingaráætlanir skila árangri

Á árinu 2021 voru unnar endurnýtingaráætlanir fyrir þrjár byggingar sem stendur til að rífa að hluta eða öllu leiti. Markmið þierrar vinnu er að kortleggja byggingarefnin og koma auga á endurnýtingarmöguleikana. Einnig er kolefnisspor sem bundið er í byggingarefnin reiknað.

Tekið var saman magn og flokkunarhlutfall úrgangs í stærstu niðurrifsframkvæmdum Reita á árinu. Í stærstu framkvæmdinni, við Ármúla 7, urðu til rúmlega 170 tonn af úrgangi og flokkunarhlutfall var 95%. Markmið Reita er að hlutfallið verði a.mk. 90% í öllum framkvæmdum.

Borðplötur á Finnsson Bistro, sem opnaði á þriðju hæð Kringlunnar á árinu, voru gerðar úr endurnýttu parketi. Þetta er eitt dæmi þess að byggingarefni séu endurnýtt. Þá voru 4 tonn af notuðum teppaflísum send í endurvinnslu hjá framleiðanda, þar sem framleidd verða ný teppi úr efninu.

29% samdráttur í losun gróðurhúsalofttegunda 2021.

Reitir kolefnisjafna losun vegna starfsemi sinnar og fasteigna sem félagið hefur umráð yfir hverju sinni auk ferða starfsfólks til og frá vinnu. Stefnt að 5% árlegum samdrætti í losun gróðurhúsalofttegunda.

Kolefnisjöfnun fer fram í samvinnu við Votlendissjóðinn vegna ársins 2021, er þetta annað árið í röð þar sem kolefnisjafnað er með þeim hætti. Reitir voru meðal stofnaðila sjóðsins árið 2018.

Með endurheimt votlendis má stöðva losun gróðurhúsalofttegunda út í andrúmsloftið auk þess sem það styður við líffræðilegan fjölbreytileika og endurheimt vistkerfa.

 

Reitir í samfélaginu

Áherslur Reita innan Heimsmarkaða Sameinuðu þjóðanna

  • Góð atvinna og hagvöxtur

  • Sjálfbærar borgir og samfélög

  • Ábyrg neysla og framleiðsla

Lagt á vogarskálarnar í baráttunni gegn Covid-19

Reitir lánuðu heilbrigðisyfirvöldum Suðurlandsbraut 34. Húsið hefur verið ein aðal bækistöð yfirvalda í baráttunni við veiruna.

 
Suðurlandsbraut 34
 
 

Aukin fjölbreytni í atvinnulífinu með Specialisterne í áratug

Reitir hafa stutt Specialisterne með húsnæði í Síðumúla í nærri áratug. Markmiðið er að aðstoða ungt fólk á einhverfurófi við að komast á vinnumarkaðinn. Starfsemin í Síðumúla byggist á því að einstaklingarnir mæta daglega og fá aðstoð við að þjálfa upp styrkleika sýna ásamt því að tekið er á veikleikum. Einstaklingsmiðuð áætlun er gerð þar sem þjálfuð er tölvufærni, farið í líkamsrækt og mikil áhersla er lögð á stundvísi og mætingu. Endamarkmiðið er atvinnuþáttaka einstaklinganna og fer ríflega helmingur í vinnu.  Aðrir fara í áframhaldandi nám eða önnur úrræði.  

Viðurkenndir góðir stjórnarhættir

Reitir hlutu á árinu viðurkenningu sem fyrirmyndarfyrirtæki í góðum stjórnarháttum. Reitir hafa hlotið viðurkenninguna árlega síðan 2015. Viðurkenningin er veitt á grundvelli úttektar á stjórnarháttum félagsins og tekur hún mið af leiðbeiningum um góða stjórnarhætti útgefnum af Viðskiptaráði Íslands, Samtökum atvinnulífsins og Nasdaq á Íslandi. Þessir aðilar, auk Stjórnvísi, veittu viðurkenninguna.  

Verkefninu Fyrirmyndarfyrirtæki í stjórnarháttum er ætlað að bæta stjórnarhætti fyrirtækja á Íslandi og auka eftirfylgni stjórna þeirra við leiðbeiningar um góða stjórnarhætti.  Í verkefninu felst að fyrirtæki þurfa að undirgangast úttekt á stjórnarháttum sínum, sem framkvæmd er af viðurkenndum aðilum, til að hljóta viðurkenninguna.